زي أختي

     العلاقة بين الولد والبنت.. كتييير اتكلمت في الموضوع ده وسألت ناس كتير فيه وشوفت فيديوهات وسمعت شيوخ وكذا داعية إسلامي بيتكلم عن الموضوع المنيّل بنيلة ده.. الأساس أصلاً إن مفيش حاجة اسمها علاقة بين ولد وبنت قبل ما يبقى في "ميثاق غليظ" بين الطرفين.. اللي هو الرباط الرسمي أو الجواز من الآخر !

     "إنت إيه علاقتك بالبنت دي ؟؟" .. "لا دي زي أختي عادي !!" .. كتير بقينا نسمع الكلمتين دول.. وبردو في وسطهم كلمة "عادي" اللي مودّيانا في داهية دي ! .. مفيش حاجة اسمها زي أختي !! .. القرآن مافيهوش علاقة اسمها كده ! .. هي يا أختك يا مش أختك (أجنبية عنك) ! .. في شروط معيّنة دينك أذن لك بيها عشان تحدّد بيها علاقتك مع الجنس الآخر (ولد\بنت)..

     أول وأهم حاجة هي الضرورة.. لازم يبقى في ضرورة لتعاملك أو كلامك مع أي بنت.. يعني مثلاً في مشروع في الكلية وفي ولاد وبنات ولازم تشتغلوا مع بعض.. بتتكلم في الشغل واللي وراكوا وبتساعدوا بعض.. خلّصتوا المشروع ومروّحين ! .. أول ما تبدأ بقى تحُط لنفسك حجج عشان تقرّبلها على شماعة إنها زي أختك وخايف عليها إعرف إنك بدأت تعدّي الضرورة ! .. تروح توصّلها لبيتها عشان يا عيني خايف عليها.. مش ضرورة ! .. تاكلوا مع بعض بعد الكلية وبعدين تبقوا تروّحوا.. مش ضرورة ! .. تعملّها أد عالبي بي إم عشان لو عوزت تسألها على حاجة أو تطّمن عليها.. مش ضرورة ! .. كل دي طرق إنت بتضحك على نفسك بيها عشان تقرّب للبنت بيها.. وإنك تقرّب للبنت ده هو اللي حرام.. مش الطرق.. بس ربنا قاللك إن كل ما هو يؤدي إلى حرام فهو حرام.. بس مش فاكر الحديث القدسي بالظبط.. وفي مقولة رائعة بتقول: "إذا حصُلَت الأُلفة رُفِعَت الكُلفة" .. يعني إيه ؟؟ .. يعني أول ما يبقى في أُلفة بينكم وتبدأوا تاخدوا على بعض في المعاملة والكلام تبدأ الحدود اللي بينكم تتشال بالتدريج ! .. النهاردة زي أختي.. بكرة أنتيمتي.. بعده مستلطفها.. بعد بعده معجب بيها.. وكله بيجيب بعضه واحنا كلنا عارفين الكلام ده كويس ! .. فا إن يبقى ليك علاقة قوية وقريبة من واحدة معيّنة بتعاملها معاملة خاصة غير أي بنت تحت حجة "زي أختي" فا ده غلط ! .. ومش "عادي" ولا حاجة ! .. كلامك يبقى على قد الظروف والمكان اللي أجبروك إنك تتعامل مع البنت الفُلانية.. بس كده ! .. من غير لا سهوكة ولا هزار من غير حدود !

     تاني حاجة مهمة هي اللمس.. وده من النقط المهمة جداً اللي بنعدّيها وبنتعايش عليها عشان كبرنا في مجتمع مش حاطط الحتة دي في الحسبان أصلاً ! .. إنك تلمس بنت مش (محرّمة عليك\مش مِحرم\أجنبية عنك) ده مش من حقك كمسلم.. وانا مش داعية ولا عندي العلم الكافي إني أقول إن ده "حرام" ! .. بس اللي أعرفه إنه غلط وماينفعش.. بس ماقدرش أفتي في درجة حُرمانينه الصراحة.. بس أياً كان يعني هو مش "عادي" !! .. مش "عادي" إنك تسلّم على أي بنت بالإيد كده زي ما معظم الناس عايشة ! .. أنا معاك إن سيدنا مُحمد قال: "أفشوا السلام بينكم" ! .. بس أصل كلمة "السلام" والإيدين ملهُمش أي دعوة ببعض على الإطلاق !! .. ممكن تشاور من بعيد وهتبقى محترم بردو وكل حاجة !

     اللي بعده.. غض البصر.. من أهم وأصعب الحاجات المهمة هي غض البصر.. مش "عادي" يا جماعة إنك تبقى واقف مع بنت بتكلمها في حاجة وعمّالين يتأملوا في عينين بعض ! .. العيون دي بتبعت رسايل ! .. وطبعاً كلنا فاهمين الحتة دي.. طبيعة الإنسان إنه بينجذب للجنس الآخر.. ومن أكبر الشبابيك على شهوة الإنسان هي العين يا جماعة.. مش قلة أدب خالص إنك تبقى بتتكلم مع واحدة ومش باصص في وشها ولا مبحلق في عينيها ! بالعكس ! .. دي هتحترمك وتعرف إنك بتكلمها عشان حاجة معيّنة ومش قاصد تبصّلها بصّة مش كويسة حتة لو بدون قصدك ! .. الحاجات اللي بنعملها واحنا مش واخدين بالنا منها دي يا جماعة بتبقى والله من أهم وأكبر المُدخلات عالشهوات والمعاصي ! .. فا الموضوع مش "عادي" خالص يا جماعة 

     وأخيراً وليس آخراً.. الخلوة الغير شرعية.. حد هييجي يقوللي "هو في خلوة شرعية ؟" هقول له آه ! *محمود بكر ستايل* .. الخلوة الشرعية هي الخلوة بين الزوج والزوجة.. هي دي الخلوة الوحيدة اللي بيسمح بيها الإسلام.. فا حاول دايماً تبقى في جماعة وماتُقفش مع بنت لوحدكوا.. ولا توصّل بنت في حتة ولا في حاجة اسمها تتمشى مع واحدة "عادي" في (النادي\الكلية\الشارع).. حُط أختك مكان أي بنت من البنات دول.. أكيد مش هتحب تشوفها ماشية مع ولد لوحدهم ! .. فا لو في ضرورة للتعامل أو الكلام أو السؤال حاول دايماً يبقى الموضوع جماعي.. وماتعاملش بنت معيّنة بطريقة مختلفة عن أي بنت.. عشان ماتقرّبهاش منك ولا تحسّسها إنك "زي أخوها" وممكن تتعوّد عليك "عادي" ! .. عشان هو مش "عادي" ولا حاجة..

الأكل

ديننا ورسولنا الكريم علّمنا إزاي ناكل وعرّفنا آداب الطعام اللي المفروض نمشي عليها.. حاجات كتير في الآداب دي بنعدّيها ونقول "عادي".. مع إنها مش "عادي" ولا حاجة والمفروض نمشي في طريق معيّن (سنّة سيدنا محمد صلى الله عليه وسلم) وبنسيب الطريق ده ونعمل اللي احنا عايزينه ونقول "قشطة يا عم عادي !" .. وهو ولا "عادي" ولا حاجة !

     عندك مثلاً موضوع الشوكة والسكينة.. مين فينا ماتعوّدش يمسك السكينة باليمين عشان يقطّع والشوكة بالشمال عشان ياكل اللي قطّعه.. سيدنا محمد (ص) قال: "سمِّ الله, وكُل بيمينك, وكُل مما يليك" .. دينك بيقوللك تاكل بإيدك اليمين.. في ناس عرفت تعوّد نفسها تمسك السكينة بإيدها الشمال والشوكة بإيدها اليمين عشان تبقى ماشية زي ما دينها بيقول.. وفي ناس زيّي عرفوا الموضوع ده متأخر وماعرفوش يعملوا غير اللي (للأسف) متربّيين عليه.. فا إضطرّوا يقطّعوا عادي بالسكينة بإيدهم اليمين وبعدين يمسكوا الشوكة بإيدهم اليمين وياكلوا بيها اللي قطّعوه.. تحسّها حاجة عبيطة وتافهة.. بس هو دينك اللي قاللك تاكُل كده.. بإيدك اليمين ! .. فا مش "عادي" ولا حاجة !

     في كمان موضوع الأكل بالإيدين.. سيدنا مُحمد صلى الله عليه وسلم كان بياكل بصوابعه التلاتة (الإبهام – السبابة – الوسطى) بس.. خطأ شائع في كلام الناس لما تسمع حد بيقوللك "كُل كُل ماتتكسفش.. ده النبي كان بياكل بصوابعه العشرة !" .. ويقوم رازعلك بردو في النص كلمة "عادي" ! .. مع إن النبي ماكنش بياكل غير بثلاث أصابع فقط ! .. وسيدنا مُحمد صلى الله عليه وسلم قال: "من ترك سنّتي فليس مني".. فا مش "عادي" ولا حاجة !

     في حوار الشُرب بردو.. أي حاجة في الدنيا بتتشرب مش المفروض إنك تشربها على بُق واحد زي ما كلنا بنعمل.. سنّة نبيّنا مُحمد صلى الله عليه وسلم بتقول إنك لازم تقسّم اللي بتشربه ده أياً كان على ثلاث مرات متقطّعة.. وبعد كل مرة تقول الحمد لله.. تيجي تسأل واحد ابن حلال زيّي وتقول له "مابتعملش كده ليه ؟؟".. يقوللك "عادي يعني !!".. وهو مش "عادي" ولا حاجة !